ЗАЕДНО СЕ БОРЕВМЕ ПРОТИВ РЕЖИМОТ, БЕШЕ ЧЕСЕН И ПРАВИЧЕН ЧОВЕК – сопартијците се простуваат од починатиот поранешен пратеник Сашко Костов
Сопартијците и високи фунционери од власта преку социјалните мрежи се простуваат од прерано починатиот поранешен пратеник, Сашко Костов од Кочани.
„Сашко Костов беше мој другар и соборец со кого заедно се боревме против режимот, а градевме живот за сите. Чесен, правичен и почитуван човек кој си го сакаше своето Кочани.
Мое најдлабоко сочувство до неговите блиски и семејството. Вечна ти слава пријателе“, напиша на фејсбук министерот за земјоделство Љупчо Николовски.
„Со неверување и длабока жалост ја примив веста за прераната смрт на поранешниот пратеник од редовите на СДСМ, Сашко Костов.
Костов беше пратеник од редовите на СДСМ во претходниот пратенички состав на македонското Собрание, а по завршувањето на пратеничкиот мандат работеше како адвокат во Кочани, од каде што и потекнува. Исклучително чесен, правдољубив и посветен човек, така ќе го паметат сограѓаните, сопартијците и сите коишто соработуваа со него. Упатувам најдлабоко сочувство до семејството и блиските на Костов. Нека му е вечна слава!“, објави министерот за внатрешни работи Оливер Спасовски.
Инаку, како што јавија медиумите, Костов починал вчера ненадејно на 50 годишна возраст.
Од Општата болница во Кочани потврдиле дека околу 10.30 часот Костов бил донесен во критична здравствена состојба по доживеан срцев удар додека бил на судско рочиште во Основниот суд.
Костов беше пратеник од редовите на СДСМ во претходниот пратенички состав на македонското Собрание. Тој е магистер на правни науки, а по завршувањето на пратеничкиот мандат работеше како адвокат. Беше татко на три малолетни деца.
Фото: Принскрин Тв Стар
